Guddoomiyaha Gobolka Banaadir oo xusay in la hirgeliyay qorshe lagu xoojinayo amniga caasimadda

Guddoomiyaha Gobolka Baanadir ahna Duqa Muqdisho ayaa sheegay in ay diyaariyeen qorshayaal lagu adkeeynayo Amniga Caasimada, isla markaana looga hortegayo falalka ay maleegayaan dhagarqabayaasha Al-Shabaab.

Eng Cabdirixman Cumar Cisman Yariisoow oo ka qeybgalay Barnaamijka kulanka Todobaadka ee ka baxa Warbaahinta Qaranka ayaa sheegay in lagu guuleystay hirgelinta nidaamka cusub ee lagu xoojinayo amniga caasimadda, ayna jiraan qorsheyaal kale oo looga hortago qaraxyada ay maleegayaan argagixisada Al-Shabaab.

“Waxaan dib u eegis ku sameynay istaraatiijiyaddii amniga ee caasimadda, waad la socotaa 30-kii Maarso ayay ahayd markii aan la hadlay shacabka,  una sheegay inaan dejinay nidaam cusub oo xagga amniga ah, isla markaana la sameyn doono howlgallo cusub oo ah, sidee shacabka ku badbaadinaa, sidee ku xoojinaa amniga, runtii waxaan rabaa inaan halkan uga mahadceliyo Madaxweynaha Jamhuuriyadda iyo Ra’iisul Wasaaraha oo awood noo siiyay hirgelinta qorshaha cusub ee amniga” ayuu yiri Eng, Yariisow.

Guddoomiyaha Gobolka Banaadir ayaa hoosta ka xariiqay in laga hortegay falkal ka dhan ah Nabad gelyada caasimadda oo ay doonayeen inay sameeyaan Al-Shabaab, isagoo intaa ku daray in la sameeyay baro cayiman oo lagu hubinayo dhaq dhaqaaqyada gaadiidka soo galaya caasimadda, halkaasi oo ay joogaan ciidamo gaaraya saddex kun oo si gaar ah loo tababaray.

Eng, Yariisow ayaa sheegay in maamulada Degmada Heer Waax ilaa iyo tabeelo ay diyaar u yihiin la shaqeynta laamaha amniga, si looga hortago cidkasta oo ka soo horjeedda horumarka caasimadda iyo Nabadgelyada ka jirta.

 

Facebook Comments